Science

ആത്മാവും സ്റ്റാൻഡേർഡ് മോഡലും തമ്മിലെന്ത്? സെബാസ്റ്റ്യൻ കൂത്തോട്ടിൽ എഴുതുന്ന ലേഖനം

പ്രപഞ്ചത്തിന്റെ തൊണ്ണൂറ്റിയഞ്ചു ശതമാനത്തോളം വരുന്ന ശ്യാമ ദ്രവ്യം, ശ്യാമോർജ്ജം എന്നിവയെക്കുറിച്ച് ശാസ്ത്രം ഇനിയും മനസിലാക്കാനിരിക്കുന്നതേയുള്ളൂ എന്നും എന്നാൽ ആത്മാവിനെ പ്രതിഷ്ഠിക്കാൻ അറിവിലെ ഈ വിടവ് പോര...

ആത്മാവും സ്റ്റാൻഡേർഡ് മോഡലും തമ്മിലെന്ത്? സെബാസ്റ്റ്യൻ കൂത്തോട്ടിൽ എഴുതുന്ന ലേഖനം

ഭൗതിക ശാസ്ത്രം 'monistic materialism' എന്ന സങ്കല്പത്തിൽ അധിഷ്ഠിതമാണെന്നും ആ സങ്കല്പം പോര എന്ന് സൂചിപ്പിക്കുന്ന ഒന്നും സിദ്ധാന്തത്തിലൊ പരീക്ഷണ നിരീക്ഷണങ്ങളിലോ ഇല്ല എന്ന് കഴിഞ്ഞ പോസ്റ്റിൽ കണ്ടു. പ്രപഞ്ചത്തിന്റെ തൊണ്ണൂറ്റിയഞ്ചു ശതമാനത്തോളം വരുന്ന ശ്യാമ ദ്രവ്യം, ശ്യാമോർജ്ജം എന്നിവയെക്കുറിച്ച് ശാസ്ത്രം ഇനിയും മനസിലാക്കാനിരിക്കുന്നതേയുള്ളൂ എന്നും എന്നാൽ ആത്മാവിനെ പ്രതിഷ്ഠിക്കാൻ അറിവിലെ ഈ വിടവ് പോര എന്ന് പറഞ്ഞാണ് കഴിഞ്ഞ പോസ്റ്റ്‌ അവസാനിപ്പിച്ചത്. എന്ത് കൊണ്ടാണെന്ന് ഇവിടെ വിശദമാക്കാം.

ഇന്നത്തെ അറിവനുസരിച്ച് നാല് മൗലിക ബലങ്ങളാണുള്ളത്. ഗുരുത്വാകർഷണ ബലം (gravitational force) വൈദ്യുത കാന്തിക ബലം(electromagnetic force), ക്ഷീണ അണുകേന്ദ്ര ബലം(weak nuclear force), തീവ്ര അണുകേന്ദ്രബലം (Strong nuclear force) എന്നിവയാണവ. ഇവയിൽ ആദ്യ രണ്ടെണ്ണം ദീർഘദൂര ബലങ്ങളാണ് (Long range force ) . എന്നാൽ അണുകേന്ദ്ര ബലങ്ങൾ രണ്ടും ഹ്രസ്വ ദൂര ബലങ്ങളാണ് ( Short range force). പേര് സൂചിപ്പിക്കുന്നതു പോലെ ഇവ അണുകേന്ദ്രത്തിനകത്ത് മാത്രം പ്രവർത്തിക്കുന്നവയാണ്. ഇവയുടെ സ്വാധീനം അണുകേന്ദ്രത്തിന് പുറത്തേക്ക് എത്തുന്നില്ല.

താരതമ്യേന ശക്തി കുറഞ്ഞ ഗുരുത്വാകർഷണ മണ്ഡലങ്ങളിലെ ഗുരുത്വബലം ന്യൂട്ടന്റെ സമീകരണം ഉപയോഗിച്ച് വിവരിക്കാം. മാങ്ങ ഞെട്ടറ്റു വീഴുന്നത് മുതൽ സൂര്യനു ചുറ്റുമുള്ള ഗ്രഹങ്ങളുടെ സഞ്ചാരപഥം കണക്കാക്കുന്നതു വരെ വളരെ കൃത്യമായി വിവരിക്കാൻ ന്യൂട്ടന്റെ സമീകരണത്തിന് കഴിയും. എന്നാൽ ശക്തി കൂടിയ ഗുരുത്വ മണ്ഡലങ്ങളിൽ ന്യൂട്ടന്റെ സമീകരണം കൃത്യമല്ല. ഉദാഹരണത്തിന് സൂര്യനോട് ഏറ്റവും അടുത്ത ഗ്രഹമായ ബുധന്റെ സഞ്ചാരപഥം ന്യൂട്ടൺ സമീകരണം പ്രവചിക്കുന്നതിൽ നിന്നും വളരെ ചെറിയ മാറ്റം പ്രകടിപ്പിക്കുന്നതായി കാണാം. വളരെ ഉയർന്ന ഗുരുത്വബലം അനുഭവപ്പെടുന്ന ബ്ലാക്ക് ഹോൾ പോലെയുള്ള സാഹചര്യങ്ങളിൽ ന്യൂട്ടൻ സമീകരണം പരാജയപ്പെടുകയും ചെയ്യുന്നു.

ആത്മാവും സ്റ്റാൻഡേർഡ് മോഡലും തമ്മിലെന്ത്? സെബാസ്റ്റ്യൻ കൂത്തോട്ടിൽ എഴുതുന്ന ലേഖനം

ഇതിനർത്ഥം ന്യൂട്ടൻ സമീകരണം തെറ്റാണെന്നല്ല, മറിച്ച് ന്യൂട്ടൻ സമീകരണം വളരെ കൃത്യമായി പ്രവർത്തിക്കുന്ന ഒരു മേഖലയുണ്ട് എന്നാണ്. ഈ മേഖലയിൽ ന്യൂട്ടൻ സമീകരണം ശരിയാണ് എന്നാണ് പരീക്ഷണ നിരീക്ഷണങ്ങൾ കാണിച്ചു തരുന്നത്. അതായത് കുറച്ചു കൂടി മെച്ചപ്പെട്ട ഒരു സിദ്ധാന്തം ഉണ്ടാകുകയാണെങ്കിൽ ആ സിദ്ധാന്തത്തിന്റെ പ്രവചനങ്ങൾ ഈ മേഖലയിൽ ന്യൂട്ടൻ സിദ്ധാന്തത്തിന്റെ പ്രവചനവുമായി പൊരുത്തപ്പെട്ട് പോകണം എന്ന് നിർബന്ധമാണ്. വേറൊരു രീതിയിൽ പറഞ്ഞാൽ പുതിയ സിദ്ധാന്തം, ഈ മേഖലയിൽ ന്യൂട്ടൻ സമീകരണമായി ചുരുങ്ങണം. ഉദാഹരണത്തിന് ഞെട്ടറ്റു വീഴുന്ന ഒരു മാങ്ങ മുകളിലേക്ക് പോകും എന്നാണ് പുതിയ സിദ്ധാന്തം പ്രവചിക്കുന്നതെങ്കിൽ ആ സിദ്ധാന്തം തെറ്റാണ് എന്നുള്ളതിന് വേറെ തെളിവൊന്നും അന്വേഷിക്കേണ്ടതില്ല. മാങ്ങയുടെ കാര്യം കൃത്യമായി മനസിലാക്കുന്നതിന് ബ്ലാക്ക് ഹോളിനെ വിവരിക്കാൻ കഴിവുള്ള സിദ്ധാന്തം അന്വേഷിച്ചു പോകേണ്ടതില്ല എന്നർത്ഥം.

ബുധന്റെ സഞ്ചാരപഥത്തെയും ബ്ലാക്ക് ഹോളിന് സമീപമുള്ള ഗുരുത്വമണ്ഡലത്തെയും കൃത്യമായി വിശദീകരിക്കുന്ന ഒരു സിദ്ധാന്തം നമുക്കിന്നുണ്ട് . സാമാന്യ ആപേക്ഷികതാ സിദ്ധാന്തം എന്നാണിത് അറിയപ്പെടുന്നത്. താരതമ്യേന ശക്തി കുറഞ്ഞ ഗുരുത്വമണ്ഡലങ്ങളിൽ സാമാന്യ ആപേക്ഷികതാ സിദ്ധാന്തം ന്യുട്ടൻ സമീകരണമായി മാറുകയും ചെയ്യുന്നു. ശാസ്ത്രം എങ്ങനെ പ്രവർത്തിക്കുന്നു എന്നതിനെക്കുറിച്ച് ഒരു ഏകദേശ ധാരണ ലഭിക്കാൻ വേണ്ടിയാണ് ഇത്രയും പറഞ്ഞത് . ഞെട്ടറ്റു വീഴുന്ന മാങ്ങയെ കുറിച്ചറിയാൻ പ്രപഞ്ചത്തിലെ എല്ലാത്തിനെയും വിശദീകരിക്കുന്ന സിദ്ധാന്തം ആവശ്യമില്ല എന്നതാണ് ഇപ്പറഞ്ഞതിന്റെ രത്നച്ചുരുക്കം.

ബാക്കിയുള്ള മൂന്ന് ബലങ്ങളെ വിജയകരമായി വിശദീകരിക്കുന്ന സൈദ്ധാന്തിക മാതൃക സ്റ്റാൻഡേർഡ് മോഡൽ എന്നറിയപ്പെടുന്നു . സ്റ്റാൻഡേർഡ് മോഡലിന്റെ അടിസ്ഥാനം ക്വാണ്ടം ഫീൽഡ് സിദ്ധാന്തമാണ്. ഈ സിദ്ധാന്തമനുസരിച്ച് കണികകൾ, കൂടുതൽ അടിസ്ഥാനപരമായ ഫീൽഡുകളിൽ നിന്നും ഉണ്ടാകുന്നു . ഫീൽഡുകൾ എല്ലായിടത്തും വ്യാപിച്ചു കിടക്കുന്നവയാണ്. എന്നാൽ കണികകൾക്ക് കൃത്യമായ സ്ഥാനമുണ്ട്. ഒറ്റനോട്ടത്തിൽ പരസ്പര വിരുദ്ധമെന്ന് തോന്നിക്കുന്ന ഇവയെ കൂട്ടിയിണക്കുന്നത് ക്വാണ്ടം സിദ്ധാന്തമാണ് . അതായത് ഫീൽഡുകളിൽ നിന്നും കണികളുണ്ടാകുന്നത് സാദ്ധ്യമാക്കുന്നത് ക്വാണ്ടം സിദ്ധാന്തമാണ് . ക്വാണ്ടം സിദ്ധാന്തത്തിന്റെ ഒരു പ്രധാന തിരിച്ചറിവാണ് നിരീക്ഷണം ക്വാണ്ടം അവസ്ഥയെ മാറ്റുന്നു എന്നുള്ളത്. ഫീൽഡുകളെ നിരീക്ഷിക്കുമ്പോൾ കാണുന്നത് കണികകളെയാണ്‌. അതു കൊണ്ട് സൈദ്ധാന്തികർ പൊതുവെ ഫീൽഡ് എന്ന വാക്കുപയോഗിക്കുമ്പോൾ പരീക്ഷണ നിരീക്ഷണങ്ങളിൽ ഏർപ്പെടുന്നവർ കണിക എന്ന വാക്ക് ഇഷ്ടപ്പെടുന്നു. ഈ വാക്കുകൾ രണ്ടും മാറിമാറി ഉപയോഗിക്കാവുന്നതാണ്.

ആത്മാവും സ്റ്റാൻഡേർഡ് മോഡലും തമ്മിലെന്ത്? സെബാസ്റ്റ്യൻ കൂത്തോട്ടിൽ എഴുതുന്ന ലേഖനം

രണ്ടു തരം ഫീൽഡുകളുണ്ട്. ബോസോണുകളും ഫെർമിയോണുകളും. ഫെർമിയോണുകളാണ് ദ്രവൃത്തി ന്റെ അടിസ്ഥാന ഘടകങ്ങൾ. ബോസോണുകളുടെ പ്രധാന ധർമ്മം ഈ ഫെർമിയോണുകളുടെ ഇടയിലെ ബലത്തിന്റെ വാഹകർ എന്ന നിലയിലാണ്. ഇതിന് എക അപവാദമാണ് ഹിഗ്സ് ബോസോൺ. മൗലിക കണങ്ങൾക്ക് പിണ്ഡം നൽകുകയാണ് ഹിഗ്സ് ബോസോണിന്റെ ജോലി.

ദ്രവ്യത്തിന്റെ അടിസ്ഥാന ഘടകങ്ങളായ ഫെർമിയോണുകളെ രണ്ടായിത്തിരിക്കാം. ക്വാർക്കുകളും ലെപ്റ്റോണുകളും. തീവ്ര അണുകേന്ദ്ര ബലത്തിന് ക്വാർക്കുകളെ മാത്രം സ്വാധീനിക്കാൻ കഴിയുകയുള്ളൂ. തീവ്ര അണുകേന്ദ്ര ബലത്തിന് സ്വാധീനിക്കാൻ കഴിയാത്ത മൗലിക കണങ്ങളാണ് ലെ പ്റ്റോണുകൾ. ഇലക്ട്രോൺ ഒരു ലെപ്റ്റോണാണ് .

ഇലക്ട്രോ മാഗ്നറ്റിക് ബലത്തിന്റെ വാഹകരായ ബോസോണാണ് ഫോട്ടോണുകൾ. W,Z ബോസോണുകൾ ക്ഷീണ അണുകേന്ദ്ര ബലത്തിന്റെ വാഹകരാണ്. തീവ്ര അണുകേന്ദ്ര ബലത്തിന്റെ വാഹകർ ഗ്ലുവോണുകൾ എന്നറിയപ്പെടുന്ന ബോസോണുകളാണ്‌.

ക്വാർക്കുകൾ, ലെപ്റ്റോണുകൾ, അവക്കിടയിലെ ബലങ്ങളുടെ വാഹകരായ ബോസോണുകൾ, മൗലിക കണങ്ങൾക്ക് പിണ്ഡം നൽകുന്ന ഹിഗ്സ് ബോസോൺ എന്നിവയെയാണ് സ്റ്റാൻഡേർഡ് മോഡൽ വിശദീകരിക്കുന്നത്‌. സ്റ്റാൻഡേർഡ് മോഡലിൽ ഉൾപ്പെടാത്ത കണികകളോ ബലങ്ങളോ ഉണ്ട് എന്നതിന് ഇതുവരെ ഒരു തെളിവുമില്ല. അതായത് ലാർജ് ഹാഡ്രോൺ കൊളൈഡറിൽ ഇന്ന് വരെ എത്തിച്ചേരാൻ കഴിഞ്ഞിട്ടുള്ള ഊർജ്ജ നിലകളിലൊന്നും സ്റ്റാൻഡേർഡ് മോഡലിൽ ഉൾപ്പെടാത്ത കണികളൊ ബലങ്ങളോ ഇല്ല. മറ്റു ബലങ്ങളോ കണികകളോ ഇല്ല എന്നല്ല ഇതിനർത്ഥം. ഇന്നത്തെ ടെക്നോളജി വച്ച് എത്തിച്ചേരാൻ കഴിയുന്ന ഊർജ്ജ നിലകളിലൊന്നും ഈ കണികകളും ബലങ്ങളും പ്രസക്തമല്ല എന്നു മാത്രമാണ്. ശ്യാമദ്രവ്യവും ശ്യാമോർജ്ജവും ഒന്നും ഈ ഊർജ്ജ നിലകളിലെ ലോകത്തെ വിവരിക്കാൻ ആവശ്യമില്ല. ഞെട്ടറ്റു വീഴുന്ന മാങ്ങയെ വിവരിക്കാൻ സാമാന്യ ആപേക്ഷികത ആവശ്യമില്ല എന്നതു പോലെ. ആ ഉദാഹരണത്തിലെപ്പോലെ ഇവയെ എല്ലാം ഉൾക്കൊള്ളുന്ന പൂർണമായ സിദ്ധാന്തം എന്നെങ്കിലും വികസിപ്പിക്കുകയാണെങ്കിൽ ആ സിദ്ധാന്തം താഴ്ന്ന ഊർജ്ജ നിലകളിൽ സ്റ്റാൻഡേർഡ് മോഡൽ ആയി മാറേണ്ടതുണ്ട്.

യഥാർത്ഥത്തിൽ ക്വാർക്കുകളെയോ ലെപ്റ്റോണുകളിലോ ഏതെങ്കിലും രീതിയിൽ സ്വാധീനിക്കാൻ കഴിയുന്നതും സ്റ്റാൻഡേർഡ് മോഡലിൽ ഉൾപ്പെടാത്തതും ആയ കണികകളോ ബലങ്ങളോ ഉണ്ടെങ്കിൽ അവയുടെ സാന്നിദ്ധ്യം കണികാപരീക്ഷണങ്ങളിൽ കണ്ടത്തേണ്ടതുണ്ട് എന്ന കൃത്യമായ ഒരു പ്രവചനം ക്വാണ്ടം ഫീൽഡ് സിദ്ധാന്തം മുന്നോട്ട് വയ്ക്കുന്നുണ്ട്. സാങ്കേതികമായി ക്രോസിങ്ങ് സിമ്മട്രി എന്നാണ് ഫീൽഡ് സിദ്ധാന്തത്തിൽ ഇത് അറിയപ്പെടുന്നത്.അതായത്, ക്വാണ്ടം ഫീൽഡ് സിദ്ധാന്ത പ്രകാരം, ലാർജ് ഹാഡ്രോൺ കൊളൈടറിലോ മറ്റ് കണികാപരീക്ഷണങ്ങളിലോ വേറെ കണികകളോ ബലങ്ങളോ കണ്ടെത്തിയിട്ടില്ല എന്നുള്ളത്, ഈ ഊർജ്ജ നിലകളിൽ സ്റ്റാൻഡേർഡ് മോഡൽ കണികകളെ സ്വാധീനിക്കാൻ കഴിയുന്ന മറ്റ് ബലങ്ങളോ കണികകളോ ഇല്ല എന്നതിന് കൃത്യമായ തെളിവാണ്.

ആത്മാവും സ്റ്റാൻഡേർഡ് മോഡലും തമ്മിലെന്ത്? സെബാസ്റ്റ്യൻ കൂത്തോട്ടിൽ എഴുതുന്ന ലേഖനം

ലാർജ് ഹാഡ്രോൺ കൊളൈഡറിൽ എത്തിച്ചേരാൻ കഴിയുന്ന ഊർജ്ജ നിലകളെക്കാൾ വളരെ കുറഞ്ഞ ഊർജ്ജ നിലകളേ മനുഷ്യന്റെ ദൈനം ദിന ജീവിതത്തെ സംബന്ധിച്ചിടത്തോളം പ്രസക്തമാകുന്നുള്ളൂ. അതായത് നമ്മുടെ ദൈനം ദിന ജീവിതവുമായി ബന്ധപ്പെട്ട അടിസ്ഥാന ഭൗതിക ശാസ്ത്ര നിയമങ്ങൾ നമുക്കിന്ന് പരിപൂർണമായി അറിയാം. അല്ലെങ്കിൽ നമുക്കിന്ന് മനസിലാക്കാൻ കഴിഞ്ഞിട്ടുള്ളതും വളരെ ഉയർന്ന വിശ്വാസ്യതയുള്ളതുമായ ഭൗതിക ശാസ്ത്ര നിയമങ്ങളുടെ ഒരു ചെറിയ ഭാഗം മാത്രമേ, മനുഷ്യ ശരീരത്തെയും ജീവനെയും ബന്ധപ്പെട്ട കാര്യങ്ങളിൽ പ്രവർത്തിക്കുന്നുള്ളൂ . ഭൗതിക ശാസ്ത്രത്തിലെ അടിസ്ഥാന നിയമങ്ങളിൽ നിന്നും തുടങ്ങി മസ്തിഷ്ക ശാസ്ത്രവും ജീവശാസ്ത്രവും വികസിപ്പിക്കാം എന്നല്ല ഇപ്പറഞ്ഞതിന് അർത്ഥം. മറിച്ച്, മനുഷ്യ ജീവിതത്തെ സംബന്ധിച്ച് വികസിപ്പിക്കപ്പെട്ടതും വികസിപ്പിക്കപ്പെടാനിരിക്കുന്നതുമായ എല്ലാ സിദ്ധാന്തങ്ങളും സ്റ്റാൻഡേർഡ് മോഡലുമായി പൊരുത്തപ്പെടേണ്ടതുണ്ട് എന്നാണ്. അല്ലെങ്കിൽ ആ സിദ്ധാന്തങ്ങൾ തള്ളിക്കളയാം.

മനുഷ്യ ശരീരവും അതിലെ തലച്ചോറുമെല്ലാം ക്വാർക്കുകളും ലെപ്റ്റോണൂകളും കൊണ്ട് നിർമ്മിതമാണ്. അങ്ങനെയാവാനേ തരമുള്ളൂ. മനുഷ്യ ശരീരത്തിന്റെ തലത്തിൽ ആറ്റങ്ങളും തന്മാത്രകളും തമ്മിലുള്ള പ്രതിപ്രവർത്തനങ്ങളേ പ്രതീക്ഷിക്കേണ്ടൂ. അതായത് ന്യൂക്ളിയാർ ലെവലിലുള്ള ബലങ്ങളോ പ്രതി പ്രവർത്തനങ്ങളോ ശരീരത്തിലോ മസ്തിഷ്കത്തിലോ നടക്കുന്നില്ല എന്നു പറയാം. അപ്പോൾ അടിസ്ഥാന ബലങ്ങളിൽ വൈദ്യുതകാന്തിക ബലവും ഗുരുത്വാകർഷണ ബലവും മാത്രമേ പ്രസക്തമാകുന്നുള്ളൂ. തലച്ചോറിൽ വിവരങ്ങൾ ശേഖരിക്കപ്പെടുന്നതും ചിന്തയുമായി ബന്ധപ്പെട്ട അടിസ്ഥാന പ്രക്രിയകൾ നടക്കുന്നതിനും എല്ലാം കാരണമാകുന്നത് വൈദ്യുതകാന്തിക ബലമാകണം. അതു കൊണ്ട് ചിന്തകളെ സ്വാധീനിക്കണമെങ്കിൽ തലച്ചോറിലെ ന്യൂറോണുകളിൽ എന്തെങ്കിലും ബലം ചെലുത്താനാകണം. എന്നാൽ സ്റ്റാൻഡേർഡ് മോഡൽ കണികകളോ ബലങ്ങളോ അല്ലാതെ അങ്ങനെ സ്വാധീനം ചെലുത്താവുന്ന ഒന്നുമില്ല എന്ന് ക്വാണ്ടം ഫീൽഡ് സിദ്ധാന്തം പറഞ്ഞു വക്കുന്നു.

ആത്മാവും സ്റ്റാൻഡേർഡ് മോഡലും തമ്മിലെന്ത്? സെബാസ്റ്റ്യൻ കൂത്തോട്ടിൽ എഴുതുന്ന ലേഖനം

ക്വാണ്ടം ഫീൽഡ് സിദ്ധാന്തത്തിന് വളരെ ഉയർന്ന വിശ്വാസ്യതയുണ്ടെന്ന് പരീക്ഷണ നിരീക്ഷണങ്ങൾ തെളിയിക്കുന്നു. മുകളിൽ പറഞ്ഞതുമായി കൂട്ടി വായിക്കുമ്പോൾ ആത്മാവിനെ പ്രതിഷ്ഠിക്കാൻ ആവശ്യത്തിന് വിടവുകൾ ഭൗതിക ശാസ്ത്രത്തിലെ അടിസ്ഥാന നിയമങ്ങൾ അവശേഷിപ്പിച്ചിട്ടില്ല എന്ന നിഗമനത്തിലെത്താവുന്നതാണ്. ചിന്തകളെ സ്വാധീനിക്കാൻ കഴിയുന്നതോ കർമ്മഫലത്തെക്കുറിച്ചുള്ള വിവരങ്ങൾ encode ചെയ്ത വക്കാൻ കഴിയുന്നതോ ആയ ഒരു ആത്മാവിനെ ഭൗതിക ശാസ്ത്ര നിയമങ്ങൾ അനുവദിക്കുന്നില്ല. മരണ ശേഷം ന്യൂറോണുകളിലും മറ്റും ശേഖരിക്കപ്പെട്ടിരിക്കുന്ന വിവരങ്ങൾക്ക് ശീരത്തെ വിട്ട് വേറെങ്ങും പോകുക സാദ്ധ്യമല്ല. മറിച്ചുള്ള വാദം വിശ്വാസ്യമാകണമെങ്കിൽ ആത്മാവ് എങ്ങനെ മനുഷ്യ ചിന്തയെ സ്വാധീനിക്കുന്നു, അതിന് ഏതെങ്കിലും ബലങ്ങൾ ആവശ്യമുണ്ടോ, തലച്ചോറിലെ ന്യൂറോണുകളിൽ ശേഖരിക്കപ്പെടുന്ന വിവരങ്ങൾ എങ്ങനെ ആത്മാവിൽ encode ചെയ്യപ്പെടുന്നു, അവയുടെ അസ്തിത്വം വളരെയധികം വിശ്വാസ്യതയുള്ള ഫീൽഡ് സിദ്ധാന്തവുമായി പൊരുത്തപ്പെടുന്നതെങ്ങനെ എന്ന ചോദ്യങ്ങൾക്കെല്ലാം വ്യക്തമായ ഉത്തരം ലഭിക്കേണ്ടതുണ്ട്. അതില്ലാത്തിടത്തോളം , ആത്മാവ് എന്ന സങ്കൽപം വെറുമൊരു കെട്ടുകഥ മാത്രമാണ് എന്ന വാദത്തിനു തന്നെയാണ് സാധുതയുള്ളത്.

ചുരുക്കത്തിൽ:

1) മനുഷ്യജീവിതത്തെ സംബന്ധിച്ചിടത്തോളം പ്രസക്തമായ അടിസ്ഥാന ഭൗതിക ശാസ്ത്ര നിയമങ്ങൾ നമുക്കിന്ന് പൂർണമായും അറിയാം.
2) ഈ നിയമങ്ങൾക്ക് വളരെ ഉയർന്ന വിശ്വാസ്യതയാണുള്ളത്. 
3) അതുകൊണ്ട് മനുഷ്യനെ സംബന്ധിച്ച ഏതൊരു സിദ്ധാന്തവും മേൽപ്പറഞ്ഞ അടിസ്ഥാന നിയമങ്ങളോട് പൊരുത്തപ്പെട്ട് പോകേണ്ടതുണ്ട്. 
4) ആത്മാവ് ,മരണാനന്തര ജീവിതം, പുനർജ്ജന്മം എന്നിവയൊന്നും ഈ അടിസ്ഥാന നിയമങ്ങളോട് പൊരുത്തപ്പെടാത്തവയാണ്. അതു കൊണ്ട് അവ ശരിയാകാൻ സാധ്യതയില്ല എന്ന നിഗമനം ഒഴിവാക്കാൻ കഴിയില്ല!

advertisment

Related News

    Super Leaderboard 970x90